Calandreta de Lescar

L’associacion Calandreta de Lescar qu’estó creada en 1992. Que participa activament au projècte Calandreta e qu’ei garanta de la gestion entà assegurar, dab los regents, un bon foncionament de l’escòla. Las ressorças financèras que vienen de las collectivitats locaus, de las adesions e de las accions miadas peus pairs.

Desempuish la soa creacion, la Calandreta que participa hèra a la vita sociau e culturau suu parçan de Lescar. Que tribalha dab l’Esquireta, associacion culturau de Lescar, a l’organizacion de mantuas animacions com la « Dauba de Nadau » en deceme o lo « Huec de la Sent Joan » cada junh au còr de la ciutat…

Calandreta Lescar que mantien desempuish mei de vint ans ua identitat e ua cultura occitanas dens ua escòla qui amassa pairs e mainatges. Gavidada directament per los pairs e los regents sus valors de solidaritat, la nosta escòla qu’ei a l’encòp laïca e gratuita entà que nat mainat non sia excludit.