PRESENTACION

Despuish 40 ans, las Calandretas que son escòlas laïcas, a gratis, e ubèrtas a tots, basadas sus 4 pielars :

  • L’immersion precòça en occitan, aci lo bearnés.
  • L’associacion de l’equipa ensenhaira e deus pairs tà har escòla.
  • Un ensenhament qui respecta lo programa de l’Educacion nacionau en aplicar las pedagogias activas, Freinet e institucionau.
  • La participacion a la vita sociau et culturau de la lenga deus mainats.

 

Ua escòla Calandreta qu’ei co-gerida per l’Estat e per ua associacion on los parents accompanhan lo desvelopament de l’escòla e s’associan aus regents tà miar los projèctes de l’escòla.
Que son los interlocutors deus partenaris financièrs e culturaus : las collèctivitats (mairias, conselhs departamentaus, regionaus…) e las associacions partenarias…
Cada associacion de basa qu’ei ligada a ua federacion deu departament, qui’s liga a las autas federacions de la region. Totas que son representadas per la Confederacion qui gèra las relacions dab lo Ministèri.

Escòla en occitan : Calandreta que son establiments escolars on l’occitan ei lenga d’ensenhament e lenga ensenhada de la mairau dinc au segondari. Lo metòde d’ensenhament utilizat per Calandreta qu’ei dongas l’immersion linguistica pregonda en occitan entà perméter au mainatge d’aquesir hèra lèu l’occitan e lo francés en arrespectant las estructuras de las duas lengas. La mira qu’ei de favorizar lo bilingüisme prendiu.

Escòla laïca e a gratis : Calandreta qu’ei ua escòla reconeguda per l’Educacion nacionau. Qu’ei devath contracte d’associacion dab l’Estat despuish 1994. Que segueish lo programma de l’Educacion nacionau.

 

Escòla au servici deu mainatge : Calandreta que desvolòpa un metòde de pedagogia qui, dens la practica, hè essenciaument compte deus tribalhs deus corrents pedagogics : « Tecnicas Freinet » e « Pedagogia institucionau ». Aquera qu’a per mira de dar la paraula au mainatge, de’u har vàder autonòme, de regular la vita deu grop e de se’n servir com un median d’aprentissatge.

Escòla associatiu : cada establiment qu’ei miat per ua associacion lei de 1901, e gavidada per un conselh d’administracion de pairs d’escolans. Los pairs qu’organizan manifestacions e animacions (repaishs, bals, lòtos, hèstas etc.) entà har víver e conéisher los lors establiments escolars.

L’objèctiu de las escòlas Calandreta qu’ei de transméter la lenga e la cultura occitanas aus mainats en bèth assegurà’us ua escolaritat eficaça. L’ensenhament qu’ei bastit suu principi de l’immersion : totas las activitats e tots los aprentissatges que’s víven en occitan, e deu CP enlà, las lengas occitana e francesa que son ensenhadas dens lo respècte deus contienguts fixats per las Instruccions Officiaus de l’Educacion nacionau. Los professors de las escòlas, formats au Centre Aprene (centre de formacion deus regents en occitan installat a Besièrs), que son devath de la responsabilitat deus Inspectors de l’Educacion nacionau.

Calandreta qu’utiliza lo metòde de l’immersion tà valorizar e desvelopar las capacitats deus mainats a entrar dens ua seconda lenga d’un biais equivalent a la purmèra.
L’immersion que permet ua acquisicion naturala de la lenga occitana dens l’arrespècte de la lenga francesa.

De la petita seccion enlà, los mainats que son sensibilizats a la diversitat lingüistica « Musica de las lengas » ; en primari, que’s desveloparà « Familhas de lengas » per un estudi mei apregonit de las corrèspondencias enter las lengas. La comunicacion dirècta dab locutors vertadièrs que demora l’utis mei utilizat tà bastir ua vertadièra consciéncia e aubertura cap a las autas lengas.

Lo projècte lingüistic qu’ei estat associat a ua pedagogia activa qui plaça lo mainat com l’actor purmèr deus sons aprentissatges. Que’s prem sus las tecnicas Freinet e sus la pedagogia Institucionala : a calandreta, que s’utilizan « Institucions » com lo Conselh, lo Qué i a de nau, los mestièrs, la correspondencia, lo tribalh cooperatiu, l’autoevaluacion…

De segur tà tota question/precision a perpaus de la pedagogia que podetz contactar lo cap d’establiment de la vòsta causida (rubrica « Los 10 establiments »).

0 Shares
Share
Tweet
Share
Pin